"Қалдырған ізің мәңгілік"

№221жалпы орта білім беретін мектебіне еңбегі сіңірген, мектебімізде 20 жылдай тәрбие саласын абыроймен басқарған құрметті ұстаз, қадірлі ана, немерелерінің сүйікті әжесі бүгінде зейнеткерлік жасқа жетіп отырған Шораева Нәзігай апайымыздың дара жолына арналған "Қалдырған ізің мәңгілік" атты кешіміз өткізілді. Кешімізді ашып беру үшін сөз кезегі мектеп директоры Жахудаев Нариман Үсенұлы мен оқу ісі жөніндегі орынбасары Жоланов Батырхан ағайға берілді.

Осы орайда мектеп ұстаздары Д.Досманбетова мен А.Жолдасованың орындауында "Ұстазыма мың алғыс " ән шашуын тарту етті.

Шораева Нәзігай Оразқызының 40 жылдық ұстаздық еңбегі  мен тәрбие саласындағы 20 жылдық еңбегі елеусіз қалмады. Оған дәлел аудандық білім бөлімінің тәрбие маманы Сегізбайқызы Гүлімжан, кәсіподақ комитетінің маманы Мамытханқызы Аякөз және тәрбие саласындағы әріптесі Жандарбекова Мира Тұрқұлқызы арнайы құттықтауларын білдіре кешіміздің қонағы болды.

Сонымен қатар кешке "ұстаз шәкіртімен мақтанады"демекші апайдың алғашқы шәкірттері аудандық әкімнің аппараты басшысы Ахметов Бақтияр және аудандық мәдениет бөлімінің қызметкері Сыздықов Жәнібек мырзаларда ұстаздарына ақ тілектерін жеткізе отырып, қадірлі қонағымыз болды.

Кешімізге апайдың шағын мемлекеті, бақытты да берекелі отбасы да құттықтау тілектерін білдірді.

Кеш әсем ән, мағыналы тілектер мен  мектебіміздің өнерлі мың  бұралған биші қыздарының би шашуларымен өз дәрежесінде өткізілді.